Lëvizja FOL ka mbajtur sot debatin me temën “Strategjia kundër korrupsion 2012-2016: Pritjet e institucioneve dhe shoqërisë civile në luftë kundër korrupsionit”. Në këtë debat është diskutuar për dobësitë dhe përparësitë e kësaj strategjie në parandalimin dhe luftimin e korrupsionit.

Hulumtuesi në Lëvizjen FOL, Armend Mazreku, ka thënë se “gjatë procesit hartues strategjia e re 2012-2016 ka përsëritur fatkeqësisht disa nga mangësitë e strategjisë së kaluar”. Më tutje, ai pohoi se “lufta kundër korrupsionit nuk mund të jetë e suksesshme, nëse paraprakisht nuk ekziston vullneti politik nga institucionet publike. Mungesa e hulumtimeve paraprake që do të tregonin nivelin e lartë të korrupsionit, shkaqet dhe karakteristiket e tij, mungesa e një hulumtimi objektiv mbi zbatueshmërinë e strategjisë paraprake 2009-2011, si dhe qasja gjithëpërfshirës e shumë sektoriale e strategjisë 2012-2016, janë vetëm disa nga shqetësimet e Lëvizjes FOL, - tha më tej hulumtuesi Mazreku.

Ndërkaq, shefi i divizionit për legjislacion dhe edukim në Agjencinë Kundër Korrupsion, Burim Sadiku, tha në anën tjetër se Agjencia ka bërë një raport të strategjisë së mëparshme. Sipas tij, edhe “strategjia e re është bazuar në vlerësimet e institucioneve të brendshme dhe ndërkombëtare sa i përket nivelit të korrupsionit në vendin tonë”. Sipas tij, “qëllimi i strategjisë së re është reduktimi progresiv i nivelit të korrupsionit në vendin tonë”. Më tutje, ai pohoi se Agjencia, së bashku me institucionet tjera e shoqërinë civile, do të bëjë gjithçka që është e mundshme që kjo strategji të zbatohet dhe në këtë mënyrë të arrihen rezultatet e pritura.

Ndërkaq, pjesëmarrësit tjerë në këtë debat shprehën disa nga shqetësimet e tyre për ngutshmërinë e hartimit të kësaj strategjie, duke mos marrë parasysh thirrjet e shoqërisë civile për realizimin e hulumtimeve empirike, për një qasje më të drejtpërdrejt në përcaktimin e sektorëve që janë më të prekur nga korrupsioni, siç është prokurimi publik, privatizimi i ndërmarrjeve publike, partitë politike, si dhe një afatizim më i qëndrueshëm kohor i masave kundërkorrupsion. /

 Kosova e Shqipëria akordohen që diaspora është e pandarë dhe të konsiderohet si e tillë. Të dy shtetet do të ndërtojnë politika të përbashkëta për diasporën shqiptare.

Ky qëndrim ka ardhur nga takimi që ministri i Diasporës i Republikës së Kosovës, Ibrahim Makolli ka pasur me ministrin e Turizmit, Kulturës, Rinisë dhe Sporteve të Republikës së Shqipërisë, Aldo Bumçi.
Sipas Ministrisë së Diasporës, ky takim u zhvillua në vazhdën e koordinimit të politikave të përbashkëta për diasporën që ministri Makolli i realizon me zyrtarë të lartë të Republikës së Shqipërisë.

“Ministri Makolli edhe në herë potencoi se diaspora është një dhe e pandarë, prandaj ai vlerësoi se politikat e të dyja shteteve, Kosovës dhe Shqipërisë, në këtë fushë duhet të jenë të përbashkëta. Në këtë kontekst, Makolli përmendi edhe hartimin dhe zhvillimin e politikave në avancimin e mësimit plotësues për fëmijët në diasporë”, thuhet në njoftimin e MD-së.

Të dy ministrat, Makolli dhe Bumçi, folën edhe për hapjen e Qendrave Kulturore në Diasporë, ku po ashtu pati një pajtueshmëri të zyrtarëve të lartë shtetërorë se, edhe në këtë çështje duhet të ketë një koordinim të aktiviteteve, për hapjen e tyre.

“Në takim u fol edhe për koordinimin e aktiviteteve të përbashkëta në kuadër të shënimit të 100 Vjetorit të Pavarësisë dhe Flamurit Kombëtar. Në këtë aspekt, të dy ministrat, Makolli e Bumçi, u pajtuan që të bashkëpunojnë ngushtë në organizimin dhe mbështetjeje e një mori aktivitetesh, si organizimin e një simpoziumi shkencor, ku do të trajtoheshin çështje të historisë kombëtare, si dhe aktivitete tjera që ndërlidhen me 100 vjetorin e Pavarësisë së Shqipërisë dhe katër vjetorin e Pavarësisë së Republikës së Kosovës”. /Indeksonline/