Hitzfeld qetëson zviceranët

58

Ish-përzgjedhësi i Zvicrës, Ottmar Hitzfeld i njeh shumë mirë futbollistët shqiptarë, sidomos Xherdan Shaqirin dhe Granit Xhakën. Ai në një intervistë për “Blick”, ka folur rreth çështjes nëse futbollistët nga Kosova do të vazhdojnë të luajnë për Zvicrën, shkruan albinfo.ch.

“Fillimisht duhet të presim dhe të shohim se çfarë do të vendos Kongresi i FIFA-s dhe më pas do të vendosin nëse lojtarët që kanë luajtur për një vend tjetër, mund të luajnë tani për tani për Kosovën, apo pas dy ose pesë vitesh”, deklaroi Hitzfeld për “Blick”.

Ai është i bindur se Shaqiri dhe Xhaka, nuk do të largohen nga Përfaqësuesja e Zvicrës. “Kombëtarja është e paprekur, është krijuar atmosferë e mirë. Ata janë të lumtur kur e shohin veten e tyre aty. Janë rritur që nga fëmijëria së bashku, prandaj jam i bindur se Xherdani dhe Graniti do të vazhdojnë me Zvicrën”, shtoi trajneri gjerman.

“Unë mund ta imagjinoj se sa të vështirë e kanë ata. Kjo është si të jesh në familje dhe të diskutosh për fëmijën tuaj. Të luaj për rrënjët e tua, apo për vendin ku je rritur. Është çështje e ndërgjegjës tuaj. Nëse ata i kushtojnë vëmendje karrierës së tyre, me Kombëtaren zvicerane shanset i kanë për suksese më të mëdha. Nëse zgjedhin Kosovën, kjo është gjë emocionale”, u shpreh Hitzfeld.